Հիշենք ու մեծարենք Արցախյան պատերազմում նահատակված ՇՏՀ-ի ուսանողներին

Հովիկ Յուրիի Աղաջանյան

Ծնվել է 1994 թ. դեկտեմբերի 20-ին Ասկերանի շրջանի Խնածախ գյուղում:

2020թ. ավարտել է ՇՏՀ-ի «Ագրոպարենային համակարգի հաշվապահական հաշվառում և աուդիտ»  բաժինը։

Ծառայության ընթացքում, մարտական հերթապահություն կրող գումարտակում եղել է որպես շտապ օգնության վարորդ։

2016թ. մասնակցել է Ապրիլյան Քառօրյա պատերազմին, ստացել թեթև վիրավորում ոտքից։

2017թ. անցել է ծառայության ԱԻՊԾ-ում, որպես վարորդ՝ հետագայում ստանալով ենթասպայի կոչում։

2020թ. հոկտեմբերի 2-ին՝ մարտական ծառայություն իրականացնելիս ստացել է ծանր վիրավորում։

Անմահացել է հոկտեմբերի 4-ին։

2020թ. սեպտեմբերի 27-ին հակառակորդի սանձազերծած լայնածավալ ռազմական գործողությունների ընթացքում ծառայողական պարտականություններն իրականացնելիս ցուցաբերած արիության ու խիզախության համար Արցախի Հանրապետության Արտակարգ իրավիճակների պետական ծառայության փրկարար ուժերի վարչության հրշեջ-փրկարարական մասի 3-րդ պահակախմբի վարորդ-փրկարար, փրկարարական ծառայության ենթասպա Հովիկ Յուրիի Աղաջանյանը հետմահու պարգևատրվել է «Մարտական ծառայություն» մեդալով։

Արցախի Հանրապետության Արտակարգ իրավիճակների պետական ծառայության տնօրենի կողմից հետմահու պարգևատրվել է «Փառքի խաչ Նոյ» մեդալով։

……………………………………………………………………………………………

Ալեքս Վարդանի Պողոսյան

Ծնվել է 2001թ. մայիսի 24-ին Մարտակերտի շրջանի Վանք գյուղում:

Սովորում էր ՇՏՀ-ի ՄՄԿ համակարգի «Փոխադրումների կազմակերպում և կառավարում տրանսպորտում» մասնագիտության  3-րդ կուրսում:

Արդեն 13 ամսվա զինծառայող էր, երբ սկսվեց պատերազմը:

Հրամանատարի կողքին մնալով մինչև վերջ՝ նվիրյալ հայորդին հենց առաջին օրը վիրավորվել է թշնամու գնդակից:

Մարտունու հոսպիտալում ժամերով պայքարել է կյանքի համար, բայց, ցավոք, նա էլ միացել է անմահների  ջոկատին:

…………………………………………………………………………………..

Արագած Անդրանիկի Ավանեսյան

Ծնվել է 2000թ. մայիսի 4- ին, Մարտակերտի շրջանի Ծմակահող գյուղում:

2018թ. ավարտել է ՇՏՀ-ի ՄՄԿ համակարգի «Ֆինանսներ» բաժինը:

Ծառայության ընթացքում Լուսակերտում մասնակցել է 6-ամսյա դասընթացների՝ ստանալով հետախուզական ջոկի հրամանատարի մասնագիտություն: Այնուհետև

շնորհվել է սերժանտի զինվորական կոչում:

2020 թվականի սեպտեմբերի 27-ին, երբ սկսվեց Արցախյան պատերազմը, Արագած Ավանեսյանը մնացած քաջորդիների նման շտապեց հայրենիքը պաշտպանելու: Սկզբից մեկնեց Մարտակերտի պաշտպանական դիրքեր, այնուհետև՝ «Եղնիկներ»: Նոյեմբերի 4-ին հակառակորդի լայնածավալ հարձակման ժամանակ «Դաստագիր» կոչվող տեղամասում ստացել է մահացու հրազենային վիրավորում:

Անմահացավ Արագածը՝ միանալով հազարավոր անմահների աստղաբույլին՝ դարձնելով այն ավելի վառ ու լուսավոր…

Արագած Ավանեսյանը հետմահու պարգևատրվել է «Մարտական խաչ» 2-րդ աստիճանի շքանշանով:

 

Ընկա՛ք, այո՛, բայց ձեր սխրանքով կանմահանաք սերունդների հուշերում, քանզի Հայրենիքը վեր դասեցիք սեփական կյանքից…

Ի հեճուկս թշնամու հայ ազգը միշտ էլ ծնել է հերոսներ, ովքեր չեն երկնչել մահվան աչքերի մեջ նայել ու  կրծքով պաշտպանել Հայոց հողը…

Հիշում ենք, հպարտանում և սգում…