Հիշենք ու մեծարենք Արցախյան պատերազմում նահատակված ՇՏՀ-ի ուսանողներին

Յուրի Արթուրի Հայրապետյան

Ծնվել է 1997թ. օգոստոսի 25-ին Մարտունու շրջանի Ճարտար գյուղում:

2012-2016թթ.-ին սովորել է Ստեփանակերտի Թամարա Քամալյանի անվան բժշկական քոլեջում՝ որպես ռազմաբուժակ:

Պարտադիր զինվորական ծառայությունից հետո, ակտիվ, պարտաճանաչ ու պատասխանատու սերժանտը, ով ամենուր սեր ու հարգանք էր տարածում իր շուրջը, որոշում է մնալ պաշտպանության շարքերում ու չի զորացրվում: Ստանում է ավագ սերժանտի կոչում և ծառայում 2018թ. մայիսից մինչև 2020թ.-ի հոկտեմբերի 23-ը:

2020թ. սեպտեմբերին ընդունվում է ՇՏՀ՝ «Ագրոբիզնես» մասնագիտությամբ:  Ավա՜ղ, նա չհասցրեց կրկին ուսանող լինել, փայլեր իր գիտելիքներով. 2020թ. սեպտեմբերի արյունալի պատերազմը նաև նրա անունը պիտի հավերժացներ պատմության հուշերում:

Մասնակցում է մի շարք մարտերի: Ունենալով անգամ սրտային հիվանդություն, նա հրաժարվում է բուժվել՝ մնալով դիրքերում:

Հոկտեմբերի 23-ին Դլղարդա կոչվող տեղամասում՝ անօդաչուի հարվածից ծանր վիրավորում է ստանում ու բռնում հավերժի ճամփան…

………………………………………………………………………………………….

Արամայիս Սպարտակի Սարգսյան

Ծնվել է 1996թ. հունվարի 18-ին ԱՀ Ասկերանի շրջանի Պատարա գյուղում, զինծառայողի ընտանիքում:

Սովորում էր ՇՏՀ-ի «Փոխադրումների և ճանապարհային երթևեկության կազմակերպում և կառավարում» մասնագիտության 5-րդ կուրսում:

Թե՛ ուսումնառության, և թե՛ ծառայության տարիներին առանձնացել է իր բարձր բարոյահոգեբանական հատկանիշներով:

2020թ. ապրիլի 27-ից ծառայության է անցել ՊԲ-ում՝ որպես պայմանագրային զինծառայող:

2020թ. ավերիչ պատերազմն անտարբեր չթողեց հայրենասեր երիտասարդին և նա իր զինակից բազմաթիվ հայորդիների հետ մարտնչեց մինչև վերջին շունչը:

Զոհվել է հոկտեմբերի 29-ին՝ իր համագյուղացի, ՇՏՀ-ի ուսանող Հարութ Խաչատրյանի հետ՝ կողք կողքի, ում անցած ուղին ներկայացված է ստորև:

…………………………………………………………………………………………

Հարութ Արարատի Խաչատրյան

Ծնվել է 1998թ. հունվարի 5-ին, ԱՀ Ասկերանի շրջանի Պատարա գյուղում:

Սովորում էր ՇՏՀ-ի «Փոխադրումների և ճանապարհային երթևեկության կազմակերպում և կառավարում» մասնագիտության 4-րդ կուրսում:

Ծառայության ընթացքում իրեն դրսևորել է որպես հայրենասեր, կարգապահ, գիտակից զինվոր: Ճանաչվել է որպես գերազանց դիպուկահար: Զորացրվելուց հետո 2020թ. ապրիլի 27-ից ծառայության է մտել ՊԲ-ում ՝ որպես պայմանագրային զինծառայող:

2020թ. սեպտեմբերի 27-ին Ադրբեջանի կողմից հրահրված Արցախյան 2-րդ պատերազմում Հարութ Խաչատրյանն իրեն դրսևորեց որպես Հայրենիքի անձնուրաց առաջամարտիկ:

2020թ. հոկտեմբերի 29-ին Հարութ Խաչատրյանը զոհվեց՝ համալրելով անմահների շարքը…

 

Անուն առ անուն ընդմիշտ կմնաք մեր սրտերում, Հայրենիքի համար մարտիրոսված նվիրյալներ… Ծնրադրում և գլուխ ենք խոնարհում ձեր հիշատակի առջև, հայրենյաց նահատակներ…