Պրոֆեսոր Բալջյան. Արցախում ինժեներական կրթության որակը կարող է լինել շատ բարձր

Shushitech.am -ի զրուցակիցն է տեխնիկական գիտությունների դոկտոր, պրոֆեսոր Պարգև Բալջյանը.

— Դուք շուրջ կես տարի է համատեղությամբ դասավանդում եք Շուշիի տեխնոլոգիական համալսարանում: Ի՞նչ հեռանկարներ եք տեսնում Արցախում ինժեներական կրթության կայացման համար.

Պ.Բալջյան.  Մինչ հարցին անցնելը նշեմ այն հաճելի փոփոխությունները, որոնց` ընդամենը 3 ամսում ականատես եղա Շուշի քաղաքում: Եվ դրանց մեջ հատկապես  դեպի տեխնոլոգիական համալսարան եկող բարեկարգված լայն պողոտան խորհրդանշում ու նաև պարտավորեցնում է նոր հաստատության զարգացման ապագան: Հիմա դառնանք բուն հարցին. տասնամյակների իմ տպավորությամբ ինժեներական մասնագիտությունը հատկապես է հարազատ ղարաբաղցու հոգուն` վկա խորհրդային և հետագա ժամանակների բազմաթիվ մեծանուն գիտնական ինժեներները, ինձ հետ սովորած և իմ դասավանդման տարիներին ուսանած ղարաբաղցի ուսանողները: Այս ամենը վկայում է, որ տեխնոլոգիական համալսարանի ստեղծումն ու հետագա գործունեությունը իրականանալի է և շատ կարևոր  ինչպես ԼՂՀ տնտեսության զարգացմանը, այնպես էլ ղարաբաղցուն իր պապենական հողի տերն ու մշակը պահելուն ուղղված ջանքերին:

— Ի՞նչ ծրագրեր  և դրանց լուծման ի՞նչպիսի ճանապարհներ եք տեսնում Շուշիի տեխնոլոգիական համալսարանում:

Պ.Բալջյան.  Յուրաքանչյուր ծրագիր արդյունավետ կարող է դառնալ, եթե սինթեզում է անցյալի իմաստություններն ու ձեռքբերումները նոր տեխնիկատեխնոլոգիական  մշակումների հետ: Շուշիի տեխնոլոգիական համալսարանում` այդ ճանապարհով զարգանալու հաստատուն և խոստումնալից առաջին քայլերի ականատեսն ենք. արդեն ստեղծվել է բնագիտական տեխնոլոգիաների ուսումնագիտական լաբորատորիան, ինչը կարծում եմ, ունիկալ է ոչ միայն Հայաստանի բուհական կրթական ոլորտում: Այստեղ տեխնոլոգիական մշակումների հետ մեկտեղ արդեն ստացվել են պարենամթերքի նոր արտադրատեսակներ: Ուսանողների կարողությունների զարգացման մեջ շատ կարևոր դեր է կատարում նաև համալսարանի և Եզնիկ Մոզյանի անվան արհեստագործական ուսումնարանի համագործակցությունը: Վերջինիս լաբորատոր բազան, որը կահավորված է արտասահմանյան ժամանակակից տեխնիկական միջոցներով, հնարավորություն է տալիս սովորողներին  ձեռք բերել կատարողական հմտություններ շինարարական, մետաղագործական, շենք-շինությունների ներքին հարդարման, ջերմա-ջրամատակարարման աշխատանքներն իրականացնելու ասպարեզում: Այս ամենը հետագայում տեսական գիտելիքների ձեռք բերման հետ ամրապնդվում և որակական նոր մակարդակ է ապահովում:

Հարցազրույցը վարեց Ալիսա Սարգսյանը