ՇՈՒՇԻԻ ՏԵԽՆՈԼՈԳԻԱԿԱՆ ՀԱՄԱԼՍԱՐԱՆԻ ՀԱՆՐԱԿԱՑԱՐԱՆԸ ՇՈՒՏՈՎ ՇԱՀԱԳՈՐԾՄԱՆ ԿՀԱՆՁՆՎԻ

Shushitech. am-ի զրուցակիցն է  “Շին-Վեր-Պլյուս”  ընկերության ինժեներ-շինարար Կամո Հակոբյանը: 

  Ավարտել է  Երևանի Ճարտարապետաշինարարական ինստիտուտը, Արցախյան գոյամարտի մասնակից է:

Շուշիում տարեցտարի ավելանում է նորակառույցների թիվը: Պետության հոգածության  և բարերարների օգնությամբ բերդաքաղաքում մի շարք շինարարարական  աշխատանքներ են ընթանում: Բեյրութաբնակ բարերար Լևոն Նազարյանն էլ անմասն չմնաց իր ներդրումն ունենալու քաղաքի վերակառուցման գործում: 2014թ.-ից, նրա հովանավորությամբ Շուշիում վերակառուցվում է ուսանողական  հանրակացարանը, որը նախատեսված է ոչ միայն Շուշիի տեխնոլոգիական համալսարանի, այլ նաև տարբեր կրթօջախների  ուսանողների  ու դրսից հրավիրված դասախոսների համար:

Համապատասխան նախագծային  փոփոխություններից հետո հանրակացարանի  շենքը  համապատասխանում է ժամանակակից չափորոշիչներին:  Այն նախագծվել է  Արցախի ճարտարագիտական կենտրոնի կողմից: Շինարարությունն իրականացնում է “Շին-Վեր-Պլյուս” «ՍՊԸ» ընկերությունը` այն կազմակերպությունը, որը կառուցել է Շուշիի տեխնոլոգիական համալսարանի ներկայիս մասնաշենքերը:

Կ. Հակոբյան. Շինարարական աշխատանքները նախատեսվում է ավարտին հասցնել նոր   ուսումնական տարվա մեկնարկին: Շինհարթակն ապահովված է ժամանակակից տեխնիկայով, հիմնականում շինարարության համար  տեղական հումք է  օգտագործվում: Նկուղից մինչև վերջին հարկ,  իրականացված է  օդափոխանակություն: Նկուղի պատերը հարդարվել  են, հատակները՝ բետոնացվել, և դրանք կարող են օգտագործվել որպես օգտակար մակերես, մասնավորապես մարզումների համար: Շենքում իրականացվել են նաև հակասեյսմիկ  աշխատանքներ: Նախագծով նախատեսված էր 69 սենյակ, սակայն փոփոխություններից հետո 11 սենյակներ  վերակազմավորվել են 2 սենյականոցների: Յուրաքանչյուր  սենյակի համար նախատեսված է սանհանգույց: Սենյակներն ապահովված են տաք ջրով, առանձին ջրաչափերով ու էլեկտրական  հաշվիչներովով: Յուրաքանչյուր հարկում  նախատեսված է հանգստի սենյակ, լվացքի մեքենանաներով  կահավորված լվացքատուն,  հարդուկարան, չորանոց: Առաջին հարկում տեղակայված է ճաշարանը, էլեկտրոնային գրադարանը, սերվերային սենյակը, բուժկետը և սպասարկող անձնակազմի համար սենյակները: Հանրակացարանի ջեռուցումն իրականացվելու է նոր կառուցված կաթսայատնից:  Ջրամատակարարումը նախատեսված է Շուշիի քաղաքային  ջրագծից: Բացի այդ նախատեսված է 18 մ³ ջրի լրացուցիչ պաշար: Հանրակացարանի յուրաքանչյուր հարկում առկա են տեսախցիկներ: Հեռուստացույցների համար նախատեսված են արբանյակային ալեհավաքներ: Հանրակացարանը կունենա նաև իր այգին, որտեղ նախատեսված է ջրավազան, նստարաններ, ճեմուղիներ,  լուսամփոփներ: Նախատեսվում է կառուցել նաև վոլեյբոլի խաղահրապարակ: Հանրակացարանի տարածքը ամբողջովին կասֆալտապատվի, իսկ մայթերն ու ծառուղիները` կսալապատվեն: Կանաչապատումը կիրականացվի  ըստ համապատասխան նախատեսված ծրագրի:

     Հավելենք նաև, որ հանրակացարանի նախամուտքում, նախատեսվում է տեղադրել   բարերար Լ. Նազարյանի ծնողների կիսանդրիները:

     Այս ամենին ականատես կլինենք աշնանը: Համոզված ենք` շինարարները ժամանակին և որակով կավարտեն  այս կարևորագույն կառույցի  շինարարությունը:

 Նյութը պատրաստեց`  Ալիսա Սարգսյանը